Die Here het vir jou 'n veel beter en heerliker 2024 in gedagte as wat jy ooit kan droom! As ons Spreuke 3 lees sien ons dat God vir ons 'n vol lewe(v2) en 'n lewe van geluk, tevredenheid en seën (v 17,18), wil gee! God nooi ons om onder Sy wysheidplan of wysheidreënboog van seën te leef.

Kom ons kyk na 5 fassette (kleure) van God se seën-reënboog:

1. Fokus op die liefde (v3-4)

   Met die woorde: moenie tekort skiet aan liefde en trou nie, wil die Spreukedigter ons herinner aan die belangrikheid van toegewyde liefde of verhoudinge. Wanneer ons op verhoudinge fokus, wag daar vir ons volgens God se wysheidplan vir ons heerlike seën. Ons Skepper en Here het dit so bedoel. Wanneer ons ons verhouding met God en met ander koester as iets uiters waardevols, dan sal ons die seënvrug daarvan pluk. Verhoudinge is jou beste belegging in 2024.

2. Vertrou God met alles (v5-6)

   Om God elke dag met alles te vertrou, beteken dat ons na Sy wil sal vra en soek wanneer dit by selfs die kleinste detail van ons lewe kom. Nie net vir groot en gewigtige sake het ons God se lig en leiding nodig nie. Die belofte is ook in hierdie verse dat God verseker vir ons die regte pad sal wys. Gelukkig het God aan ons Sy Woord kom gee propvol van Sy wyse leiding en helder lig. Verder het Jesus vir ons kom wys hoe God se pad en wil prakties lyk in die lewe van elke dag. Volg Sy voetspore en jy sal weet wat God se seënvolle wil in alles is.

3. Beveg selfoorskatting (v7-8)

   Die meeste van ons kan so maklik onsself oorskat deur te dink of doen asof ons alles weet en onbeperkte vermoëns het. Die waarheid is egter: ons kan nie alles doen nie; ons weet nie alles nie; ons kan nie vir alles ja sê en ons program net voller prop nie; ons kan nie almal tevrede stel nie; ons kan nie alles beheer nie en ons kan verseker nie alles vir almal wees nie. Ons moet ons eie menslike beperkinge ken. Ons is nie God nie! Daarom is Psalm 46:11 so helend: bedaar (wees stil) en weet Ek is die Here...Ons kan gerus ophou God probeer speel en ontspan! Ken jou plek en jouself. Die gevolg is: dit sal jou gesond hou en jou lewenskrag vermeerder.

4. Aanvaar wanneer God jou reghelp (v11-12)

   Die Here gaan verseker sekere van die gebeure in 2024 gebruik om ons reg te help en te dissiplineer sodat ons weer in pas met Sy seënvolle wil vir ons lewe sal kom. Wees oop en ontvanklik daarvoor! Gee ag daarop en neem hierdie liefdeswerking van 'n liefdevolle Pa ter harte.

5. Help ander (v27-28)

   Moenie wag om goed te doen vir iemand wat dit nodig het nie. God gaan gereeld gedurende 2024 oor ons pad, mense stuur wat hulp nodig het! Elkeen van hierdie goeddoen-geleenthede is geleenthede van seën. Wyse mense van God is op die uitkyk en sensitief vir hierdie geleenthede om goed te doen. Die beste kommentaar op hierdie woorde is die spreukedigter self: wie medelye het met ’n mens in nood, met hom gaan dit goed (14:21).

God se volmaakte plan

Deel van God se volmaakte plan met ons almal is om hierdie jaar meer as ooit te groei in ons verhouding met Hom, en om in pas met Sy wil te leef. Daar is vyf bakens wat hierdie jaar vir ons in die gemeente kan help om koers te hou op God se pad:

Gemeente-visie

Om 'n gemeente te wees waar lidmate, gedring deur die liefde van Christus, vir mekaar en ander omgee.

Jaartema

God roep, ons bou! Ons wil hierdie jaar spesiale moeite doen om doelgerig ons gemeente te herbou. Die afgelope paar jaar was moeilik. Ons het baie verliese beleef. Ons het kosbare lidmate verloor. Daar is baie bedieninge en aktiwiteite wat in ons gemeente dood geloop het. En die tyd het aangebreek vir ons om ook weer ons gemeente te herbou en op te bou. Ons is opgewonde oor wat die Here in ons en deur ons gemeente gaan doen. Hy het 'n spesiale plan vir ons en Hy is besig om 'n wonderlike storie deur ons te skryf.

Sy Woord

Ons wil in hierdie jaar groei in ons kennis en uitlewing van God se Woord. Ons wil ook dieper in ons verhouding met die Here groei. Daarom gaan ons Sondae en in ons omgeegroepe meer tyd spandeer om dieper te delf in die Woord en hoe ons dit in ons lewe kan toepas. Ons beplan lekker preek-reekse en werkswinkels vir die jaar.

Gebed

Ons is 'n geloofsfamilie en dit beteken ons beskou mekaar as boeties en sussies. Ons dra mekaar se laste en gee om vir mekaar. Ons gebedspan leef met die oortuiging van Jakobus 5:16 - Die gebed van 'n gelowige het 'n kragtige uitwerking. Daarom wil ons ook meer van gebed in ons gemeente maak, sodat God se wil in ons gemeente sal geskied, ons Sy Gees se leiding duidelik sal ervaar, en dat alles wat ons doen Sy Koninkryk meer sigbaar sal maak. Ons wil ook nie hê ons lidmate moet alleen hulle uitdagings hanteer nie. Daar is toegewyde kinders van die Here wat reg staan om langs jou in te skuif en sáám jou te bid. Enige gebedsversoek is altyd welkom.

Verhoudings

Naas ons verhouding met God, is ons verhouding met mekaar ook 'n belangrike fokuspunt. Huweliksverhouding, gesinsverhouding en verhouding met mede-gelowiges (veral in ons bedieninge en omgeegroepe) is vir ons van wesenlike belang. Ons wil in hierdie jaar deurlopend aan ons verhoudings werk en so in ons verhoudings groei.

Kom ons gaan saam opmars met ons Leidsman, en laat Hom toe om ons te vorm en te gebruik tot Sy eer.