Die Here het vir jou 'n veel beter en heerliker 2024 in gedagte as wat jy ooit kan droom! As ons Spreuke 3 lees sien ons dat God vir ons 'n vol lewe(v2) en 'n lewe van geluk, tevredenheid en seën (v 17,18), wil gee! God nooi ons om onder Sy wysheidplan of wysheidreënboog van seën te leef.
Kom ons kyk na 5 fassette (kleure) van God se seën-reënboog:
- Fokus op die liefde (v3-4)
Met die woorde: moenie tekort skiet aan liefde en trou nie, wil die Spreukedigter ons herinner aan die belangrikheid van toegewyde liefde of verhoudinge. Wanneer ons op verhoudinge fokus, wag daar vir ons volgens God se wysheidplan vir ons heerlike seën. Ons Skepper en Here het dit so bedoel. Wanneer ons ons verhouding met God en met ander koester as iets uiters waardevols, dan sal ons die seënvrug daarvan pluk. Verhoudinge is jou beste belegging in 2024.
- Vertrou God met alles (v5-6)
Om God elke dag met alles te vertrou, beteken dat ons na Sy wil sal vra en soek wanneer dit by selfs die kleinste detail van ons lewe kom. Nie net vir groot en gewigtige sake het ons God se lig en leiding nodig nie. Die belofte is ook in hierdie verse dat God verseker vir ons die regte pad sal wys. Gelukkig het God aan ons Sy Woord kom gee propvol van Sy wyse leiding en helder lig. Verder het Jesus vir ons kom wys hoe God se pad en wil prakties lyk in die lewe van elke dag. Volg Sy voetspore en jy sal weet wat God se seënvolle wil in alles is.
- Beveg selfoorskatting (v7-8)
Die meeste van ons kan so maklik onsself oorskat deur te dink of doen asof ons alles weet en onbeperkte vermoëns het. Die waarheid is egter: ons kan nie alles doen nie; ons weet nie alles nie; ons kan nie vir alles ja sê en ons program net voller prop nie; ons kan nie almal tevrede stel nie; ons kan nie alles beheer nie en ons kan verseker nie alles vir almal wees nie. Ons moet ons eie menslike beperkinge ken. Ons is nie God nie! Daarom is Psalm 46:11 so helend: bedaar (wees stil) en weet Ek is die Here...Ons kan gerus ophou God probeer speel en ontspan! Ken jou plek en jouself. Die gevolg is: dit sal jou gesond hou en jou lewenskrag vermeerder.
- Aanvaar wanneer God jou reghelp (v11-12)
Die Here gaan verseker sekere van die gebeure in 2024 gebruik om ons reg te help en te dissiplineer sodat ons weer in pas met Sy seënvolle wil vir ons lewe sal kom. Wees oop en ontvanklik daarvoor! Gee ag daarop en neem hierdie liefdeswerking van 'n liefdevolle Pa ter harte.
- Help ander (v27-28)
Moenie wag om goed te doen vir iemand wat dit nodig het nie. God gaan gereeld gedurende 2024 oor ons pad, mense stuur wat hulp nodig het! Elkeen van hierdie goeddoen-geleenthede is geleenthede van seën. Wyse mense van God is op die uitkyk en sensitief vir hierdie geleenthede om goed te doen. Die beste kommentaar op hierdie woorde is die spreukedigter self: wie medelye het met ’n mens in nood, met hom gaan dit goed (14:21).
- Besonderhede
Hoop is so bitter nodig in hierdie tyd
"Ons is almal diep onder die indruk dat ons mekaar baie nodig het en dat ons saam sterker is te midde van hoe fel die uitdagings ookal mag wees," sê dr Gustav Claassen, algemene sekretaris van die NG Kerk, in 'n kort bemoedigende videoboodskap namens die Algemene Sinode aan lidmate en leiers van die kerk.
Claassen maak ook spesiale melding van lidmate wat as mediese personeel en gesondheidswerkers in die voorste linies teen die koronavirus veg, dikwels teen 'n baie hoë prys.
Lidmate word ook versoek om inenting teen die koronavirus sterk te oorweeg omdat dit 'n effektiewe wyse bied om die virus te beveg.
(Bron: Kerkbode - 11 Junie 2021)
- Besonderhede
Beste susters en broers
Die inperking van individuele vryheid om rond te beweeg en te werk is vir ons 'n nuwe ervaring. COVID-19 is egter 'n geleentheid vir die kerk om te doen wat sy die beste doen - om mense in nood te bedien en hoop en lig te bring na donker plekke en omstandighede.
Dit is ook 'n tyd om mekaar se harte aan te raak - deur wat ons sê, wat ons deel, wat ons doen en deur wat ons nie doen nie - en om die lewens te beskerm wat God so liefhet. In hierdie liefde moet ons die manier waarop ons aanbid en gemeenskap met mekaar het, aanpas by die veranderende tye gedurende die pandemie. Ons moet die risiko om bronne van oordrag te word vermy, maar moet draers van genade bly.
In die lig van COVID-19 reageer die wêreldgemeenskap met drastiese stappe om die verspreiding van die siekte te beperk en die impak daarvan te verlig.
In ons reaksie as 'n kerk is dit baie belangrik om te luister na die raad van gesondheidsorgkundiges, met kundigheid oor hoe om die gemeenskap te beskerm en te verhoed dat die virus verder versprei. Ons moet ook op hoogte bly van openbare aankondigings.
As kerk is ons deel van gemeentes en gemeenskappe waar ons na aan mekaar woon en werk. Ons moet op hierdie nuwe situasie reageer op maniere wat met ons visie ooreenstem. Ons moet hulp verleen aan die weerloses, aan dié wat angstig of ge-isoleer voel. Terwyl ons dit doen, moet ons voldoen aan die sosiale maatreëls en protokols wat ingestel is om verdere infeksies te verhoed.
As plaaslike kerke dink julle reeds anders oor aanbiddingspraktyke, insluitend die bediening van die nagmaal, die oordra van vrede en om mekaar te groet op maniere wat ons gemeenskaplike lewensdoel weerspieël terwyl ons ook luister na die gesondheidsadvies van kundiges.
Die situasie verander vinnig. Bly daarom ingelig deur die amptelike gesondheidskanale van jou plaaslike regering of gebied. Jy sal in hierdie tyd ook vanuit kerklike kringe op hoogte gehou word deur briewe soos hierdie en Kerkbode by
Intussen het daar 'n oproep van president Cyril Ramaphosa gekom om deel te wees van 'n nasionale gebedsgeleentheid. Die tyd wat vir hierdie gebedsgeleentheid voorgestel word, is 26 Maart 2020 vanaf 18:00 tot 18:30. Die NG Kerk wil graag hieraan deelneem. 'n Beroep word gedoen dat elke gemeente, op watter manier ook al binne die voorgeskrewe maatreëls, daaraan sal meedoen.
Vir vandag se gebedsgeleentheid en vir die tyd vorentoe vra ons dat daar vir die volgende sake voorbidding gedoen sal word:
- ons regering, regeringsamptenare en personeel in departemente
- almal wat sal werk om noodsaaklike dienste te lewer - mediese en verwante beroepe, sekuriteitsektor, kleinhandelsektor, bankwese, vervoer, en so meer
- mense wat die virus opgedoen het en familie wat daardeur geraak word
- die armste van die armes en dié wat liggaamlik meer blootgestel is aan die virus.
Saam in Sy diens
Gustav Claassen
Algemene Sekretaris
- Besonderhede