Die Wêreldgesondheidsorganisasie gedenk slegs drie siektes op spesifieke dae. Een van hierdie toestande is outisme, en dit dui op die voorsiene impak wat hierdie toestand op die samelewing gaan hê. Die tweede April is outisme dag en die hele maand word wêreldwyd gebruik vir bewusmaking en inligtingverspreiding. Dit word aanvaar dat een uit elke honderd kinders gediagnoseer word om op die outistiese spektrum te val. As ons aanvaar dat hierdie syfer dieselfde is in Suid-Afrika, beteken dit dat 'n kind met outisme elke uur in ons land gebore word en dat daar huidiglik in die Vrystaat ongeveer 400 kinders per jaar gebore word met die diagnose.
Outisme is 'n toestand wat die ontwikkelende kinderbrein affekteer en probleme veroorsaak in drie areas, nl. kommunikasie, sosiale interaksie en die verbeeldingswêreld. Die algemene publiek sal dikwels eerste dink aan die karakter soos uitgebeeld deur Dustin Hoffman in Rain Man of miskien Raaiselkind van Annelie Botes. Hierdie siening verarm die werklikheid, aangesien elke kind met outisme uniek is.
Hulle het almal probleme in die areas reeds genoem, maar sal van mekaar verskil in ander. So sal die kinders wissel in vermoë, van talentvol tot kognitief gestremd, verbaal tot nie-verbaal, hipo- of hipersensitief vir die omgewing en met 'n geaardheid wat wissel van passief tot aktief.
Meeste mense weet van die verbasende vaardighede wat sommige persone op die outistiese spektrum het, soos bv. rekenkundige vaardighede, geheue vir feite of kuns- en musiektalent. Dit is steeds nie duidelik hoekom sulke besondere talent dikwels gepaardgaan met onverwagse swak punte in ander areas nie. Die waarheid is dat meeste van die kinders 'n ontwikkelingspatroon van sterk en onverwagse swak punte het.
Navorsing toon aan dat hul breinontwikkeling op 'n vroeë ouderdom versteur word a.g.v. 'n wisselwerking tussen gene en die omgewing. Dit veroorsaak dat die kommunikasiepunte tussen senuweeselle atipies ontwikkel, sodat die brein beter lokale- as langafstandkonneksies vorm. Dit bring mee dat hulle die omgewing anders ervaar en taal moeilik verstaan en ook meer geïnteresseerd is in voorwerpe as in mense.
Die kritieke sosiale interaksie tussen ouer en kind word dus versteur, wat lei tot verdere onderstimulasie en dat die kind ontsnap na 'n wêreld wat vir hom of haar voorspelbaar is. Hierdie ontsnapping manifesteer as herhalende gedrag, bv. 'n fassinasie met draaiende voorwerpe en moontlik later spesifieke belangstellings soos dinosourusse, treine of selfs die verskillende tipes kragpale. Omdat die kinders se voorkoms nie verskillend van tipiese kinders is nie, is mense dikwels onverdraagsaam teenoor hul soms vreemde optrede, iets wat soms vir ouers 'n verleentheid is.
Vroeë waarskuwingstekens van die toestand sluit in kinders wat nie op hulle naam reageer nie, stadige of atipiese taalontwikkeling, atipiese interaksie met hul portuurgroep en stereotipe bewegings. In 'n meertalige omgewing soos Suid-Afrika sal kinders soms presenteer met 'n taal wat aangeleer word van die televisie en wat verskil van die huistaal. Navorsers glo dat ons binnekort babas tussen en ses en twaalf maande reeds sal kan identifiseer deur te kyk na onder andere die kwaliteit van hul oogvolgbewegings.
Dit is van groot belang dat alle kinders met gevaartekens vroeg verwys word vir evaluasie, want vroeë ingryping kan keer dat outisme die normale ontwikkeling nog meer ontwrig. Terapeute en onderwysers wat spesialiseer in outisme-spesifieke behandeling speel hier 'n kritiese rol.
Die Internet is nog geduldiger as papier en ongelukkig wissel die kwaliteit van inligting beskikbaar vir ouers geweldig. Die gerug dat immunisasies en kwik die oorsaak is van die verhoogde voorkoms van die toestand word steeds aktief versprei. Ouers kan gerus na 'n boek soos Autism’s False Prophets deur Dr. Paul Offit gaan om nader aan die waarheid te kom oor hierdie onderwerp. Outisme Suid-Afrika en Autism Speaks het beide webwerwe met baie hulpbronne en besonderhede oor goedgekeurde diensverskaffers.
Die ongemaklike waarheid is dat ons nog nie goedgevestigde dienste vir veral jong kleuters in die Vrystaat het nie. Daar is gelukkig klasse wat ontwikkel in skole soos Lettie Fouché, Willem Postma en Pholoho. Die Vrystaat Outisme Ouervereniging het 'n privaatskool begin wat huidiglik n diens bied aan sewe leerders.
Die filosoof John Rawls het gesê dat, indien ons 'n nuwe samelewing sou beplan waar ons eie plek en talente versluier is, ons dit so sou doen om veral die kwesbares en weerloses in 'n vangnet te ondersteun. Hierdie is 'n kwessie wat ons almal raak en gaan raak en daarom behoort ons as samelewing saam te staan en te help.
Dr. D.J. Griessel - Ondervoorsitter Outisme Suid-Afrika
Op 31 Oktober 2017 vind die vyfhonderdjarige herdenking van die Reformasie plaas. Volgens oorlewering het Martin Luther op 31 Oktober 1517 sy 95 stellinge teen die kerkdeur van Wittenberg vasgespyker.
Alhoewel dit 'n uitnodiging tot gesprek was, word dit allerweë beskou as die begin van 'n reeks gebeure wat op 'n breuk met die Katolieke Kerk uitgeloop het en wat bekend sou word as die Reformasie.
Die Woord alleen, genade alleen, geloof alleen en Christus alleen was die boustene van die Reformasie wat deur die eeue die pilare van die gereformeerde godsdiens sou word.
Dit is ook waar die teologiese wortels van die NG Kerk te vind is. Via Johannes Calvyn en later ons Neder¬landse voorvaders het die gereformeerde godsdiens in 1652 saam met Jan van Riebeeck in die Kaap geland. Die koms van die Franse Hugenote in 1688 het die invloed van die Reformasie aan die suidpunt van Afrika verder versterk.
Wat maak hierdie gebeure vandag relevant en belangrik? Die slagspreuk "Terug na die toekoms!" help ons verstaan. Dit beteken dat ons verstaan van die hede en ons visie vir die toekoms bepaal word deur ons verlede. Wie nie rekening hou met die verlede nie sal moeilik sin vind in die hede en nog moeiliker koers hou in die toekoms.
Daarom nooi ek jou saam op 'n reis, 'n reis wat ons gaan terugneem in ons gereformeerde verlede. As reisgenote gaan ons belangrike rolspelers in die reformasie opsoek en met hulle in gesprek tree, gaan ons by belangrike plekke en vergaderings aandoen en gaan ons die ontstaan van belangrike leerstellings oordink.
In 2017 gaan ons saam voortreis deur die hede op pad na 31 Oktober en saam soek na die sin en betekenis van gereformeerd-wees in die 21ste eeu.
Geskryf deur Prof Johan van der Merwe (Kerkgeskiedenis-professor aan die Universiteit van Pretoria vir e-Kerkbode).
Ons dank U Here vir die voorreg om ons kind te kon sien trou en om U genade al hoe meer te waardeer!
Ek is so dankbaar dat U my gehoor het in my benoudheid van die motorongeluk. U het my 'n tweede kans gegee. Joey
Dankie dat U ons seun sterk gemaak het om sonder ongewensde goed in sy lewe te kan leef.
Na drie jaar se wag het U ons kom verras met 'n wonderwerk uit U hand toe ons dit die minste verwag.
Dankie vir groot genade, liefde en onverdiende guns so mildelik ontvang dag na dag.
Dankie vir 'n nuwe gesonde kleinkind.
Dankie dat U my beskerm en omvou het gedurende my nagmerrie van "smash & grab". Vir al U liefde en dat U altyd daar is vir my. Ek loof U!!! Susan
Ek loof U waar U by my was met 'n noodoperasie vir retina-loslating. Elaine
Ek loof U vir die verlossing van my vrou se lyding. Die rykdom van U genade is groot!
Dankie dat U vir my kinders en kleinkinders voorsien het in hul nood vir werk, huisvesting en ander seëninge. Ons eer U!
Dankie vir nuwe werk!
Ek loof U vir oorplasing na Pretoria!
Here, ek loof U vir vertroosting, genade en geloofsgroei. U daaglikse bystand en sekerheid in hierdie deurmekaar wêreld. Dankie my Verlosser!
Here ek loof U vir genesing van my wederhelf!
2015/16 was hard. Vierkeer in hospitaal en drie operasies. Nou heeltemal gesond! Dankie Here! Lettie
Ek loof U vir die deure wat U toe en oopgemaak het voor U my dierbare man kom haal het. Vir vertroosting, moed .. en pad wat U gelyk maak ... Ook vir broers en susters in die geloof.
Here ek loof U want U het my vrou deur twee hartaanvalle ene bloedklont in long bewaar! Ook my dogter met brongitis. Dankie!
HERE ek loof U dat U altyd in beheer is van ons lewe! Niks kan ons van U liefde skei nie. Philip & Shirley
Dankie vir U liefde en U kosbare Woord!
Ek dank U vir elke genadegawe deur die jaar!
Dankie Heer vir goeie gesondheid en die liefde van al my kinders en familie.
Ek dank U vir al die "klein" dinge wat ons nie altyd "raaksien" nie bv. plante, reën, voëls, diere ens.
Ek loof U dat U my elke dag staande hou in my omstandighede!
Loof U vir die krag wat U elke dag aan ons gee!
Dankie vir reën en gesondheid! Alleen
Dankie getroue Here dat U al ons krankhede op U neem en dat U by ons bly tot in die ouderdom!
Dankie Here dat U ons gehelp het onder ons finansiëLe druk en ons staande gehou het.
Dankie vir gesondheid, pragtige kinders en kleinkinders asook goeie mense op my pad.
Here ek loof U vir U goedheid, 'n wonderlike seun en ma. Dankie dat U altyd voorsien en vergewe.
Here ons loof U vir goeie gesondheid, krag van Bo en genade. Wat ek ontvang het kom alles van U.
Ek loof U vir die genade elke dag. Vir beterskap in my gesondheid sodat ek kan aangaan in die lewe. Baie dankie Here!
Hierdie gemeente eer U as die Hoof en Here van U kerk! As gemeente gee ons U die eer vir U troue sorg oor baie jare heen. Ons dank U vir leraars, personeel, leiers en lidmate wat met hul gawes U gemeente dien. Ons is ook dankbaar vir elke omgeegroep waar mense omgee-liefde teenoor mekaar uitleef. Dankie vir die verskil wat U deur hierdie gemeente in die gemeenskap maak. Aan U alleen bring ons dank!
Beste kollegas,
Soos ooreengekom skryf ek direk aan jou, van tyd tot tyd, oor sake op die kerklike terrein. My skrywe het altyd ten doel om jou so goed as moontlik in die prentjie te bring oor ontwikkelinge rondom dit wat op die agenda van die ASM se sakelys is. Andersins kommunikeer ek belangrike inligting is wat jy spoedeisend moet van kennis neem. Hierdie skrywe, langer as gewoonlik, wil aan jou belangrike inligting en agtergrond, gee oor 'n berig wat heel moontlik môre, die 13de Augustus, in die Rapport sal verskyn.
Die Moderamen het laat gistermidag 'n prokureursbrief ontvang wat namens lidmate op regsgronde versoek dat daar voortgegaan moet word met die uitvoering van die besluite van die Algemene Sinode oor selfdegeslag verbintenisse. Prop LLB Gaum, Prof HL Bosman, Dr M Coetzee, Dr FM Gaum, Dr C Jones, Prop JJ Kotze, Dr N Marais, PH Oberholzer, HW Pienaar, L Vermeulen, en Adv L Wessels is oortuig dat die appélproses teen Algemene Sinode besluite nie regsgeldig is nie. Die reëls van Reglement 19 van die Kerkorde is volgens die briefskrywers strydig met die Kerkorde waaraan dit ondergeskik moet wees. In 'n tweede versoek betoog hulle dat die opskorting van die uitvoering van die Algemene Sinode se besluite ook ongeldig is en nie in ooreenstemming met soortgelyke regspraktyk is nie. Ter stawing van beide betoë het hulle ‘n regsmening van Adv Wim Trengrove bekom en aangeheg aan hulle skrywe.
Die besluite van die NG Kerk se Algemene Sinode van Oktober 2015 oor selfdegeslagverhoudings is gevolg deur verskeie appélle daarteen. Sommige punte in die appélle handel met tegniese kwessies en ander met die beginsel van die saak. Dit was die eerste keer dat lidmate teen 'n besluit van die Algemene Sinode appél aangeteken het. Hoewel die Kerkorde slegs voorsiening maak vir appélle na 'n meerdere vergadering, d.w.s van bv. 'n ring na 'n sinode, is daar in die onlangse verlede 'n punt in Reglement 19 van die Algemene Sinodale reglemente toegevoeg wat nou voorsiening maak vir appélle teen besluite van die Algemene Sinode.
Van die begin af was daar vrae of die reglement nie buite orde is nie, aangesien die Kerkorde self nie melding maak van die moontlikheid van appélle teen besluite van die Algemene Sinode nie. Daar is ook vertoë gerig en betoog teen die opskorting van die uitvoering van die besluite van die Algemene Sinode vanweë die appélle. Die Moderamen en Algemene Taakspan Regte (ATR) het onder meer 'n brief ontvang van 65 lidmate wat beswaar gemaak het teen die besluit om die uitvoering van die Algemene Sinode se besluite tydelik op te skort hangende die appélle.
Reglement 19 maak voorsiening dat 'n volgende Algemene Sinode of 'n appélliggaam wat deur die ATR aangewys moet word, die appélle moet aanhoor. Die ATR het besluit om sodanige appélligaam aan te wys, maar dat dit moet bestaan uit persone wat nie by die vorige Algemene Sinode teenwoordig was nie. Die ATR moes hiervoor eers met sekundi aangevul word. Dit moes deur die moderamen gedoen word. Die appélliggaam kan gevolglik nou eers saamgeroep word. Reglement 19 bepaal egter dat die appélle binne 21 dae na die ontvangs daarvan aangehoor moet word of deur 'n volgende Algemene Sinode.
Ds Nelis Janse van Rensburg, voorsitter van die moderamen, het na die ontvangs van die brief gesê dat dit nie sleg is dat daar regsekerheid oor hierdie aangeleentheid verkry word nie. Terwyl daar nie regsekerheid is nie, sal daar altyd agterdog bly bestaan oor die regsgeldigheid van die appélproses en die opskorting van die uitvoering van besluite waarteen daar geappelleer word. Sy aanvoeling is dat dit wenslik is dat 'n hoër hof uitsluitsel gee oor beide aangeleenthede. Sou die appélproses op regsgronde gestuit word, bly die moontlikheid steeds bestaan om in terme van die Kerkorde die volgende Algemene Sinode te nader met 'n beswaarskrif of 'n gravamen.
Hy het ook gesê "hoe vinniger ons met die regsproses kan vorder, hoe beter vir almal. Ons is ongelukkig in onbekende vaarwaters en die advies van regslui en -prosesse kan vir ons selfs verder help met die oog op kerklike prosesse. Intussen word daar in die moderamen gedink aan moontlike maniere waarop daar groter insluiting kan kom van kerkvergaderings by besluitnemingsprosesse wat met kontensieuse sake handel. Die moderamen is ook besig met die ontwikkeling van ‘n missionale strategie vir die Algemene Sinode se werksaamhede. Laat ons almal saam in hierdie dae bid dat die Hoof van die Kerk, ons op ongekende maniere sal lei tot geloof en diensbaarheid. Die oes is immers groot."
Saam in Sy diens.
Gustav Claassen
Algemene Sekretaris
Nederduitse Gereformeerde Kerk